iTeen 大本營


小學生德育故事演講比賽親子倡廉組2017- 銀獎《神秘的土地》

第二十一屆荃灣葵涌青衣區小學生德育故事演講比賽-親子倡廉組 銀獎:神秘的土地 學校:保良局世德小學 學生:羅子軒 家長:陳美珊女士

2017年06月02日

故事名稱:神秘的土地

太臣:國王,聽聞有一個傳說,傳說話有一片「神秘的土地」,無論你放咩入泥土裏面種,都可以種出黃金果實。但係,就一直都冇人知道呢片土地喺邊……

國王:我最鐘意收集奇珍異寶!如果我可以揾到呢片「神秘的土地」,將佢收歸成我其中一個收藏品就好嘞!究竟點樣先可以揾到呢!

大臣:國王,我已經派咗好多士兵去揾架嘞,但係……就一直都冇消息……

國王:哼!冇鬼用!我而家落命令,全國嘅人民都要放低手上嘅工作,幫我揾,揾,搵!快d同我將呢個消息公佈出去!

大臣:係!國王!

旁白:消息傳出之後,全國國民都唔敢違抗命令,只好放低手頭上嘅工作,幫國王搵「神秘的土地」。不過,話明係傳說,話明係神秘,又點會咁容易揾到吖!

大臣:報告國王!我地……仲未搵到「神秘的土地」……
國王:吓!已經過左2個月,仲未搵到?!真係急死人啦!梗係d國民偷懶!……再傳令落去,限國民10日內要搵到,否則,全國國民都要受罰!

大臣:A……國王,其實你都已經有好多奇珍異寶啦……呢2個月黎,國民都放低哂手上嘅工作幫你去搵,完全冇生產過……而家糧食短缺,好多國民都捱緊肚餓……

國王:哼!你呢個大臣斗膽教訓我?等我搵到「神秘的土地」,就大把金,到時想要咩都有啦!快傳令落去!
大臣:係……國王!

旁白:國王嘅命令嚇到國民心慌慌,好多國民都心灰意冷,選擇逃難到快樂國。快樂國國王見到咁多難民湧到自己國家,覺得好奇怪,於是去了解情況……

快樂國國王:哦~原來係咁嘅原因,「神秘的土地」?!(笑)等我邀請「珍寶國」嘅國王黎我嘅國土,到時佢就會明白嘞!

旁白:3日後,「珍寶國」嘅國王黎到快樂國……

快樂國國王:歡迎「珍寶國」國王來到我快樂國……

國王:哼,做咩無端端叫我黎,我好忙架,我忙住搵…….

快樂國國王:國王你係咪忙住搵「神秘的土地」呢?

國王:吓!你點知架?!唔通你都想搵埋一份?!

快樂國國王:當然唔係啦,因為我已經有啦~唔信你望下呢邊?再望下嗰邊?見到咩呢?

國王:我…….我見到好多農作物……仲見到好多金黃色嘅果實……

快樂國國王:咪就係囉,我全國嘅土地都係「神秘的土地」啦!

國王:唔….我明白嘞,我真係傻,而且太貪心嘞!完全冇諗過國民嘅感受同需要。其實我嘅國家都一樣,每一片土地都係「神秘的土地」!只要我同國民齊心合力,收成一定比黃金珍貴!

快樂國國王:哈哈哈!恭喜你終於明白嘞!

旁白:响國王同國民嘅努力下,珍寶國原本荒廢左嘅土地,3個月後都變得豐盛起黎,當然仲有好多黃金啦!